Mental health problems after childbirth and how to deal with am
After childbirth, e dey expected say the mothers go dey overwhelmed with joy as dem welcome dia newborn. But nor be so e dey always be; some women go dey jangolova with plenty emotions and e fit take them months or even years to recover from am.
The Common mental health problems after childbirth na:
1. Postpartum Blues
Postpartum blues or “baby blues” na one of the most common mood disturbance wen women dey experience after birth. Postpartum blues dey come with very mild symptoms, and almost every woman dey experience am after childbirth.
Common symptoms na temporary feelings of sadness, tearfulness, or irritability. Typically, dese symptoms fit last only some hours or few days, and e go stop on em own after one or two weeks.
Postpartum blues nor require make you visit doctor. Just make sure say you get strong support of family and friends wen dey help you cope with the stress wen dey follow childbirth waka come.
2. Postpartum Depression
Some doctors say wen postpartum blues comes and the mama nor get enough support, e fit turn into depression. Postpartum depression na one of the commonest mental health problems after childbirth, and na great danger to the mother and her pikin.
Symptoms of postpartum depression na so so low mood, loss of interest for usual activities and the mama nor go get interest to care for the pikin, she go dey feel worthless , she nor go dey sleep well, and she go get suicidal thoughts. If you get previous history of depression previous history of postpartum depression, you fit dey at risk of am.
If you notice any of these symptoms, visit your doctor. Your doctor go start you on medications or therapy to help you deal with the depressive thoughts.
3. Postpartum Anxiety
Every body wan make sure say the baby dey healthy and say the mama dey recover well. But, something dey wen dem dey call too much concern: na em dem dey call postpartum anxiety.
You dey wake up many times for night to go check on your pikin? You don notice say you nor dey able to leave your pikin for one minute because of fear say the pikin go stop to breathe or fit choke on breast milk. Nor be say dis concerns nor dey normal once in a while, but if e too much e nor normal again.
Follow your doctor talk to help you deconstruct all dese thoughts. You fit need anti-anxiety medications or make you start therapy to modify your thoughts and emotions.
4. Postpartum Psychosis
Postpartum psychosis dey regarded as medical emergency because e dey place the mother and her pikin for great danger.
Postpartum psychosis dey come with irrational thoughts toward or about the newborn pikin. Some mothers don think say dia newborn dey demonic or say dem send dem come the world to harm dem.
Others go say dem dey hear voices wen dey tell dem say make dem harm the baby. All the thinking nor real, and e get great danger to the pikin and the mama.
Treatment for postpartum psychosis include anti-psychotic medications as well as therapy wen go help deal with the thoughts
Dem dey really under estimate mental health problems after childbirth, and most women dey vulnerable at this time. Untreated, mental health problem for postnatal period fit lead to severe complications for both mama and her pikin.
