Operation no be thing of joy na why many people and dem family dey begin worry after doctor don say the next step na operation.
E get steps to take wen go make the operation dey safe for you or person wen dey close to you .
Make I yarn you Emily story so you go fit learn one or two from am .
Doctor wen wan do Emily operation (surgeon) don yarn Emily say them go give her injection wen do make her enter deep sleep so she no go feel wen dem dey comot the seeds (lumps) wen dey her left breast and armpit and say she go need stay hospital for two days after the operation.
Emily mind strong after she follow her doctor yarn finish but wen she reach house and her people begin ask her plenty questions her mind come begin dey cut .
Operation dey get two ways wen dem take dey do am Open approach surgery or minimally invasive surgery (the place dem go cut go small ) but for operation to go well no ne only the doctor hand e dey o .
Make I yarn you 5 things wen you need do wen you wan do operation:
• Make sure say you ask your doctor questions so you go know everything wen dey go on . Before you give doctor permission to do operation make sure say you dey satisfied with answer wen doctor give you to all your questions. No rush give permission o follow your family members talk make all of una dey d same page before you carry on.
You sef go ready to give the doctor correct answers to all him questions. If you no dey sure about any answer no guess tell the doctor say you no sure . Shame no dey .
• if you carry doctor wen know you along e go help you know more about the operation. You need know say the surgeon wen wan carry out your operation sabi d work . You need to get am for mind say d way the operation go turn out no be about if the doctor be expert but na how all of una (you , doctor and team) go perform before, during and after operation.
• you need to find out wetin the operation go cost both before the surgery, after surgery care even food and any other expenses. If you no find out how much everything go be you go fit enter gbese wen the bills show.
• you need to get people wen you want make dem dey around you ready . The person wen go follow dey the hospital you go need tell am . Even your friends and families need to dey around you e go help you recover fast .
• after the operation e go still get some treatment wen dem go need give you . No say because operation don finish you no go come follow up . If you no follow up after surgery kasala fit burst .
Some people go just get mind say immediately after the operation everything don go back to normal and wen e no go back frustration go start .e dey help make you join group of people wen don do the same kind operation wen you do so una go dey share things wen go help .
If you no plan for the surgery well e fit turn to problem for you and your family members. E dey pay to know everything about the operation , cooperate with the doctor follow people wen go give you better support yarn . If you focus well you and your family go think of the operation begin smile and una go get better information to share with anybody wen wan do the same kind of operation.